Buriya yize Amategeko n’umuziki, Umuramyi Gentil Misigaro ni muntu ki?

Gentil Misigaro ni umunyamuziki wamamaye mu muziki usingiza Imana ndetse no kuwutunganya.

Gentil Misigaro yavukiye mu Rwanda aba ari naho yiga amashuri abanza, icyakora ayisumbuye ayiga muri Uganda aho yize ibijyanye n’Amategeko.

Ni imfura mu muryango w’abana batandatu, muri bo harimo abahungu bane n’abakobwa babiri.

Kaminuza nayo yize muri Uganda, uyu muhanzi yakurikiye ibijyanye na muzika ari nabyo afitemo impamyabumenyi.

Ubwo yajyaga muri Canada muri 2012 uyu muhanzi yahise atangira kwihugura ibyo gukora no gutunganya indirimbo (Music production), yanize imyaka itatu ibijyanye n’Iyobokamana.

Nyuma yaho yatangiye kwigisha umuziki muri Canada na cyane ko ari byo yize muri Classical & Contemporary Music, yigishije umuziki mu mashuri anyuranye yaba aya Leta n’Ayigenga.

Yakoze indirimbo zinyuranye zahembuye imitima ya benshi zirangajwe imbere na “Biratungana,” “Hari Imbaraga”, “Buri munsi” na “Hano ku isi” yafatanyije na Adrien Misigaro n’izindi nyinshi.

Indirimbo ze nyinshi azitunganyiriza muri studio ye iri muri Canada.

Tariki 10 Werurwe 2019 ni bwo yakoreye igitaramo cy’amateka mu Rwanda.

Tariki 16 Werurwe 2019 ni bwo Gentil Misigaro yasezeranye kubana akaramata n’umukunzi we Rhoda Misigaro mu muhango wabereye mu rusengero New Life Bible Church ku Kicukiro mu Mujyi wa Kigali, basezeranywa na Pastor Aaron Ruhimbya wa ERC Kimisagara. Ubukwe bwabo bwari ibirori byiyongereye ku bindi dore ko kuri iyo tariki ari nabwo Rhoda yizihiza isabukuru y’amavuko.

Ubukwe bwabo babukoze nyuma y’icyumweru kimwe Gentil Misigaro akoreye mu Rwanda igitaramo cy’amateka ari nacyo cya mbere yari ahakoreye.

Muri iki gitaramo cyabaye kuwa 10 Werurwe 2019 kikabera mu ihema rya Camp Kigali ni bwo Gentil Misigaro yerekanye bwa mbere umukunzi we Rhoda baburaga iminsi micye bakarushinga.

Gentil na Rhoda bibarutse umwana wa kabiri ku ya 16 Kanama 2021, nyuma y’amezi 11 bibarutse imfura yabo bise Abraham Misigaro wabonye izuba tariki ya 4 Nzeri 2020.

Umwana wabo w’ubuheta bamwise Asaph Misigaro.

Afite ibihembo (Awards) bitandukanye birimo na Top Canadian Immigrant of the year yahawe mu mwaka wa 2014.