Amafaranga yamuhinduye ikimenyabose, Elon Musk ni muntu ki?

Elon Musk yavukiye mu mujyi wa Pretoria wo muri Afurika y’Epfo, ku wa 28 Kamena 1971.

Akiri umwana, yagaragaje impano idasanzwe mu ikoranabuhanga, aho ku myaka 12 gusa yakoze umukino wa mudasobwa witwa Blastar awugurisha ku madolari 500 mu 1983.

Musk yimukiye muri Amerika mu 1988 aho yize muri Kaminuza ya Pennsylvania, akaminuza mu bukungu n’ubumenyi bw’ibinyabuzima. Nyuma yaje gukomeza amasomo ye mu mashuri makuru, ariko ahagarika amasomo ye ya PhD muri Stanford mu 1995 kugira ngo yibande ku mishinga y’ikoranabuhanga yari yaratangiye.

Mu 1996, yashinze ikigo cyitwaga Zip2 cyafashaga ibinyamakuru mu gukoresha ikoranabuhanga mu gukwirakwiza amakuru.

Mu 1999, indi kompanyi yari ikomeye yitwa Compaq yaguze Zip2 kuri miliyoni 307 z’amadolari. Elon Musk asigarana  miliyoni 22 z’amadolari.

Mu 1999, Musk yashinze X.com yaje guhinduka PayPal.

Iki kigo cyoroheje uburyo bwo kohereza no kwakira amafaranga ku isi yose.

PayPal yateye imbere, bituma eBay na yo yari kompanyi ikomeye muri urwo ruganda iyigura kuri miliyari imwe n’igice mu 2002.

Ibi byahinduye urwego rw’imari n’ubucuruzi kubera ko byaguye ihererekanywa ry’amafaranga.

Mu 2002, Musk yatangije SpaceX, intego ye ikaba kwari ugushakisha uburyo bwo kugeza abantu ku mubumbe wa Mars.

Muri 2008, SpaceX yabaye ikigo cya mbere cyigenga cyohereje icyogajuru mu isanzure, cyongera kubigeraho mu 2020 ubwo cyoherezaga icyogajuru gitwaye abantu (Crew Dragon).

Muri 2004, Musk yinjiriye companyi yitwa Tesla, ikaba yari isanzwe ikora imodoka.

Yaje kuyibera umuyobozi mu 2008. Muri uwo mwaka nanone,Tesla yashyize ku isoko Model S, imodoka y’amashanyarazi ifite ubushobozi buhambaye.

Muri 2023, Tesla yohereje imodoka zirenga miliyoni 4 ku isoko.

Muri 2006, Musk yatangije SolarCity, intego ikaba gutanga ingufu zisubira ku isi yose.

Muri 2015, yatangije Starlink, ishami ryo kugeza internet mu bice byose by’isi hifashishijwe ibyogajuru.

Starlink ifite ibyogajuru birenga 4,500, bikaba byarahinduriye ubuzima abantu barenga miliyoni 5 mu bice byitaruye.

Muri 2016, Musk yashyizeho Neuralink, ikigo kigamije guhuza ubwonko bwa muntu n’ikoranabuhanga.

Intego y’iki kigo ni ukugabanya indwara z’ubwonko nka Alzheimer na Parkinson, indwara zizahaza ubwonko.

Muri 2017, Musk yatangije Boring Company igamije kugabanya umuvundo w’imihanda.

Elon Musk kandi yagaragaye cyane mu bijyanye na Dogecoin, ukaba umushinga ukomeye mu bijyanye n’ifaranga ry’ikoranabuhanga (CryptoCurrency), aho yagiye ashishikariza abashoramari kugura ubwo butunzi bw’ikoranabuhanga.

Muri 2022,Elon Musk yaguze urubuga rwa Twitter ku madolari miliyari 44, ahita anaruhindurira izina arwita X.

Muri 2024, umutungo wa Musk wari miliyari 449 z’amadolari nk’uko  Forbes magazine, CNN, Yahoo Finance n’ibindi bitangazamakuru byabitangaje.

Elon Musk ni umwe mu bantu bageze ku bikorwa bihindura amateka mu ikoranabuhanga, ubukungu, siyansi no mu isanzure.