Yapfuye amaze guhesha Liverpool FC igikombe, ninabwo yaramaze kurongora, umukinnyi Diogo Jota yari muntu ki?

Amazina yiswe n’ababyeyi ni Diogo José Teixeira da Silva, yamenyekanye nka Diogo Jota mu mupira w’amaguru, yavutse tariki ya 4 Ukuboza 1996.

Diogo Jota yatangiye gukina umupira w’amaguru iwabo mu gihugu cya Portugal, mu ikipe ya Paços de Ferreira.

Yinjiye mu Cyiciro cya Mbere muri 2015, yerekeza muri Atlético Madrid nyuma y’umwaka umwe gusa.

Diogo Jota icyo gihe ntiyakinnye muri La Liga kuko yahise atizwa muri FC Porto yatsindiye ibitego umunani.

Amaze kwitwara neza yabengutswe na Wolves yamutiye iri mu Cyiciro cya Kabiri, ariko birangira imuguze  miliyoni 12£.

Mu myaka itanu yamaze akinira Liverpool, Jota yatsinze ibitego 47 muri Premier League.

Yanafashije iyi kipe kwegukana Igikombe cya Shampiyona, FA Cup na Carabao Cup ebyiri.

Diogo Jota yakinaga ku ruhande rw’ibumoso asatira izamu muri Liverpool.

Iyi kipe yayigezemo muri 2020, aguzwe miliyoni 41£ muri Wolvermpton Wanderers.

Mu ikipe y’igihugu ya Portugal yatangiriye mu ngimbi kuva mu makipe y’abakinnyi bari munsi y’imyaka 19,21 na 23.

Muri 2019 nibwo Diogo Jota yahamagawe mu ikipe nkuru ya Portugal atoranywa mu bakinnyi bakinnye igikombe cy’isi cya 2022 ndetse na Euro ya 2020 na 2024.

Yatwaranye na Portugal UEFA Nations League ya 2019 na 2025.

Hari hashize ibyumweru bibiri Jota ashyingiranywe n’umukunzi we Rute Cardoso bari bafitanye abana batatu, mu bukwe bwabereye i Porto.

Urupfu rw’uyu mukinnyi Diogo Jota warufite imyaka 28 rwatangajwe n’itangazamakuru ryo muri Portugal nyuma y’impanuka y’imodoka yabereye mu Ntara ya Zamora aho yari kumwe na murumuna we, André warufite imyaka 26, na we wahaburiye ubuzima.