Afite umwaka 1 Nyina na Se bahanye gatanya, Umutoza Rúben Amorim ni muntu ki?

Rúben Filipe Marques Amorim yavutse tariki ya 27 Mutarama mu 1985, avukira mu gace ka Lisbon muri Portugal.

Uyu mutoza ntabwo yigeze abana n’ababyeyi be cyane dore nyuma y’umwaka umwe avutse bahise bahana gatanya.

Urugendo mu mupira w’amaguru yarutangiye ari umukinnyi aho yahereye mu ikipe y’abato ya Atletico Cultural y’iwabo muri Portugal mu 1998. Nyuma yaje kujya mu ikipe ya Belenenses, aza kuzamurwa mu ikipe nkuru maze ayikinamo umukino wa mbere mu 2003.

Mu mwaka w’imikino wa 2007/2008 Ruben Amorim wakinaga mu kibuga hagati yitwaye neza aho yakinnye 28 muri 29 Belenenses yakinnye, akayifasha kurangiriza ku mwanya wa 8 muri shampiyona.

Ibi byaje gutuma muri 2008 yerekeza mu ikipe ya Benfica asinyayo amasezerano y’imyaka 4.

Ku mukino we wa mbere yabanje mu kibuga muri iyi kipe, yatsinze igitego gusa nyuma yaho ibintu ntibyagenda neza kubona umwanya wo gukina biba ikibazo bijyanye n’abakinnyi yabaga ahanganye n’abo barimo Javi García na Ramires.

Muri iyi myaka yari muri Benfica ntabwo ibintu byagenze neza atangira gutizwa mu yandi makipe maze muri 2017 afata umwanzuro wo gusezera kuri ruhago burundu.

Yasezeye nyuma y’uko yari yari atwaranye na Benfica ibikombe birimo bitatu bya shampiyona ndetse anagerana nayo ku mukino wa nyuma wa Europa League.

Ruben Amorim yanakiniye ikipe y’igihugu ya Portugal aho yahereye mu batarengeje imyaka 18 naho nyuma kuva mu 2010 kugeza muri 2014 agakinira inkuru aho yakinnye imikino 14 idafite igitego n’umupira wakivuyemo.

Yinjiye mu bintu bijyanye no gutoza nyuma yo kureka gukina ruhago aho yahise ajya gufata amasomo ajyanye nabyo ndetse akajya no gukora imenyereza mwuga muri Manchester United ubwo yatozwaga na Jose Mourinho.

Mu 2018 yahise ajya gutoza ikipe ya Casa Pia ikina shampiyona y’icyikiro cya Gatatu muri Portugal.

Mu 2019 iyi kipe yaje kugira ibibazo ikurwaho amanota ndetse inahagarikwa ibikorwa byose bifite aho bihuriye n’umupira w’amaguru bituma Ruben Amorim nawe afata umwanzuro wo gutandukana nayo.

Uyu mutoza yaje kubwirwa kujya gutoza ikipe y’abatarengeje imyaka 23 ya Benfica gusa arabyanga ahubwo ahitamo kujya gutoza ikipe ya Kabiri ya Braga yakinaga muri shampiyona y’icyiciro cya Gatatu muri Portugal.

Nyuma y’amezi atatu yaje kujya gutoza ikipe ya mbere asimbuye Ricardo Sá Pinto wari wirukanwe. Ruben Amorim muri iyi kipe yitwaye neza ndetse aza gukora n’amateka yo gutsindira Benfica iwayo nyuma y’uko iyi kipe yari imaze imyaka 65 itabikora.

Mu mikino yose yatoje muri iyi kipe yatsinzwemo ibiri yonyine,ayifasha kugera muri 1/8 cya UEFA Europa League ndetse anatwarana nayo igikombe cya Taça da Liga.

Tariki ya 4 Mata muri 2020 nibwo Ruben Amorim yagizwe umutoza w’ikipe ya Sporting CP asinya amasezerano y’imyaka 3. Nyuma yo kugera muri iyi kipe,Ruben Amorim yitwaye neza arinaho benshi batangiye kumumenyera. Mu gihe ayimazemo, amaze gutwarana nayo ibikombe 2 bya shampiyona na 2 by’igihugu.

Amaze kuba umutoza w’umwaka muri shampiyona ya Portugal inshuro 2 aho yabikoze mu 2021 ndetse akanabikora mu mwaka ushize w’imikino.

Ikipe ya Manchester United yamaze kwemeranya n’ikipe ya Sporting  kubishyura Miliyoni 10 z’Amayero dore ko uyu mutoza yari akiyifitiye amasezerano.