Perezida John Pombe Magufuli yari muntu ki?

John Pombe Magufuli, umuhungu wavutse ku muhinzi-mworozi utifashije akaza kuba Perezida wa Tanzania mu mwaka wa 2015, yapfuye  afite imyaka 61, leta itangaza ko yazize ibibazo by’umutima.

Yavukiye i Chato, mu majyaruguru ashyira uburengerazuba bwa Tanzania, mu mwaka wa 1959.

Yize ubutabire (chimie/chemistry) n’imibare kuri Kaminuza ya Dar es Salaam, yabaye umwarimu w’ubutabire n’imibare, Yatowe bwa mbere nk’umudepite mu 1995.

Uyu wigeze gushimagizwa kubera uburyo bwe bw’imikorere burimo no kuvuga atarya indimi, yagezeho aba umutegetsi utavugwaho rumwe, by’umwihariko ku bijyanye na gahunda ye ijyanye n’icyorezo cya coronavirus.

Mbere yuko aba perezida, yahimbwe izina rya ‘tingatinga’ – rya ya modoka ninini ikora imihanda – kubera kuyobora gahunda yo gukora imihanda ubwo yari minisitiri w’ibikorwa-remezo, ndetse nyuma aza gushimagizwa kubera uko yitwaye ku kibazo cya ruswa n’uburyo yangaga bikomeye isesagurwa ry’amafaranga.

Nka perezida, yanashinjwe kwibasira abatavuga rumwe n’ubutegetsi no kugabanya ubwisanzure bumwe na bumwe, ariko nyuma y’urupfu rwe, mu kwibaza ku gihe yamaze ku butegetsi hazajya hibandwa ku buryo bwihariye bwe wenyine mu guhangana na Covid-19.

Ubwo Covid-19 yageraga muri Tanzania, Perezida Magufuli ntabwo yemeye ibyo gutuma abantu baguma mu rugo. Yashakaga ko bajya mu nsengero, kiliziya no mu misigiti gusenga.

Kuva mu kwezi kwa gatandatu mu 2020, ubwo yatangazaga ko iki gihugu “kitakirangwamo Covid-19”, uyu perezida, ari kumwe n’abandi bategetsi bo hejuru muri leta, bannyeze akamaro k’udupfukamunwa, bashidikanya niba gupima ubwandu hari icyo bimaze, ndetse bamera nk’abashwaza ibihugu baturanye byashyizeho ingamba zo guhangana n’iyi virusi.

Ubwo yarahizwaga nka perezida mu kwezi kwa cumi mu 2015, kuri manda ya mbere y’imyaka itanu, Magufuli yasaga nk’umuntu Tanzania yari icyeneye – umutegetsi utanga umusaruro kandi udashobora kurya ruswa.

Ku munsi we wa mbere na mbere ku butegetsi, yatanze ubutumwa bwo kuburira mu buryo bukakaye ko atazihanganira ibyari byarabaye akamenyero ku bakozi ba leta byo gusiba akazi uko bishakiye.

Yakuyeho ibirori byo kwizihiza Umunsi w’Ubwigenge – ku nshuro ya mbere mu myaka 54 yari ishize ibyo birori biba.

Mu 2017, umwarimu wa kaminuza wo muri Kenya yageze aho asaba ko Afurika ikorerwa icyo yise “Magufulication”, mu rugendo yari yakoreye kuri Kaminuza ya Dar es Salaam. Ucishirije mu Kinyarwanda, uwo yasabaga ko Afurika ihindura imitegekere ikaba nk’iya Magufuli.

Mu 2020 yatsindiye manda ya kabiri n’amajwi 84%, ariko amashyaka akomeye atavuga rumwe n’ubutegetsi yamaganye ibyayavuyemo avuga ko yabayemo uburiganya – ibyo akanama k’amatora kahakanye.

Visi Perezida wa Tanzania, Samia Hassan Suluhu niwe wahise asimbura John Pombe
amaze gupfa muri 2021 nkuko byagenwe n’itegeko nshinga ryatowe mu Gushyingo kwa 2020.