Byaramukomeranye ahungira muri Ambasade, Jenerali Jean Bosco Ntaganda wakatiwe gufungwa imyaka 30 ni muntu ki?

Jenerali Jean Bosco Ntaganda yavutse mu 1973, avukira mu kinigi mu ntara y’Amajyaruguru y’Urwanda.

Ku mpamvu z’ibyaha yashinjwaga, ku nshuro ya mbere muri 2006 urukiko mpuzamahanga mpanabyaha rwashyizeho inyandiko zo kumuta muri yombi ashinjwa kwinjiza abana mu nyeshyamba.

Yaje kohererezwa uru rukiko rw’i Hague mu Buholandi mu 2013 amaze gusumbirizwa mu ntambara akabura amajyo akaza mu Rwanda akajya muri ambasade ya Amerika.

Amakuru yavuzeko kwishyikiriza ubutabera yabitewe no gutsindwa ku ruhande rwe mu makimbirane yari amaze gucamo kabiri umutwe wa M23.

Muri Gicurasi 2012, ku byaha yashinjwaga hiyongereyeho gufata ku ngufu, ubwicanyi, kugirira nabi abasiviri kubera ubwoko bwabo, ibi bijyana n’ibyarezwe uwari umuyobozi we Thomas Lubanga umuntu wa mbere wahamijwe ibyaha n’uru rukiko amezi abiri mbere y’icyo gihe.

Ntaganda yakatiwe gufungwa imyaka 30 n’urukiko rwa ICC kubera ibyaha 18 by’intambara yahamijwe yakoze hagati ya 2002 na 2003.

Umushinjacyaha mukuru wa ICC yavuze ko “Ntaganda ari umugabo mubi ku rwego rumwe na Joseph Kony”.

Ibi nibyo byabayeho mu myaka myinshi mu gihe Perezida Joseph Kabila yari yaranze kumufata  ngo kugira ngo amahoro ahinde muri DR Congo nk’uko yabivugaga.

Byatumye uyu wari inyeshyamba agirwa jenerali akomeza kwidegembya mu mujyi wa Goma, adakorwaho aho yabaga mu buzima bw’agatangaza bwo kwinywera imivinyu no gukina tennis.

Akiri umwana, iwabo bahungiye i Ngungu muri DR Congo kubera amateka mabi yivangura ryakorerwaga Abatutsi mu Rwanda.

Niho yigiye amashuri ariko ntiyarangiza ayisumbuye.

Mu 1990 afite imyaka 17 yinjiye mu ngabo zari iza  RPA Inkotanyi, nyuma yuko Inkotanyi zibohoye igihugu zikanahagarika Genocide yakorerwaga Abatutsi mu 1994, Ntaganda yahise agana muri DRC ahari imitwe yitwaje intwaro myinshi .

Muri 2002 yinjiye mu mutwe wa Union des Patriotes Congolais (UPC) muri Ituri aho yamaze imyaka itatu ari we ushinzwe ibikorwa bya gisirikare by’uyu mutwe wa Thomas Lubanga.

Nyuma yinjiye mu wundi mutwe witwa CNDP  wayoborwaga na Laurent Nkunda, undi murwanyi wari ukomeye mu karere, kimwe na Ntaganda.

Ntaganda yageze aho ahirika Gen Nkunda afata ubutegetsi bwa CNDP, mu masezerano y’amahoro ya 2009, Ntaganda yinjijwe mu gisirikare cya DR Congo azamurwa mu mapeti agirwa Jenerali.

Yakoreraga i Goma, aho yari ayoboye abasirikare bagera ku 50,000, benshi muri bo bahoze ari inyeshyamba bakomeje n’ubundi kuba abantu be.

Mu 2008, abanyamakuru mpuzamahanga bamufashe amashusho ayoboye ibitero mu gace kitwa Kiwanja kuri 90Km uvuye i Goma, aha hishwe abantu 150 ku munsi umwe gusa.

Yshinjwe kuyobora ibitero byishe abantu bagera kuri 800 kubera ubwoko bwabo mu mujyi wa Mongbwalu mu karere ka Ituri mu 2002,icyo gihe abarwanyi be bari bamaze gufata aka gace gakungahaye ku mabuye y’agaciro.

Mu kwezi kwa kane 2012, yivanye mu gisirikare cya DR Congo, ava mu mujyi wa Goma atwara abasirikare barenga 600 bafite intwaro nyinshi.

Kabila yahise ategeka ko bamufata – gusa avuga ko atazamushyikiriza ICC yamushakaga.

Mu mpera z’uwo mwaka, umutwe wa M23 yari ayoboye wafashe umujyi wa Goma ariko nyuma wemera kuwurekura, amezi yakurikiyeho y’imirwano yatumye abantu bagera ku 800,000 bava mu byabo.

Uruhande rwa Ntaganda rwatsinzwe n’urwa mugenzi we Col Sultani Makenga, bisa nkaho yatinye gupfa maze afata inzira ajya mu Rwanda yerekeza i Kigali muri ambasade ya Amerika aho yaje kohererezwa urukiko rwa ICC rwari rumaze imyaka rumushaka.

Kuva muri 2015 yaraburanishijwe muri 2019 ahamwa n’ibyaha 18 by’intambara, akatirwa gufungwa imyaka 30.